ផ្សារ ARDB ជាផ្សារអនឡាញសម្រាប់លក់ផលិតផល និងកសិផលកសិកម្ម បង្កើតឡើងដោយ ធនាគារ ARDB (Agricultural and Rural Development Bank) ក្នុងគោលបំណងផ្សព្វផ្សាយដើម្បីជំរុញការលក់ផលិតផល និងផ្សារភ្ជាប់រវាងអ្នកផលិតដែលជាសហគមន៍ ឬ បណ្តុំក្រុមអ្នកផលិត កសិដ្ឋាន អ្នកផ្គត់ផ្គង់សម្ភារកសិកម្ម អ្នកប្រមូលទិញ ក្រុមហ៊ុន ឬ សហគ្រាសកែច្នៃ នាំចេញ សេវាដឹកជញ្ជូន និង អ្នកប្រើប្រាស់ ដែលស្របតាមផែនការយុទ្ធសាស្រ្ត និង គោលនិយោបាយអាទិភាពរបស់រាជរដ្ឋាភិបាលគាំទ្រលើវិស័យកសិកម្ម។
អត្ថប្រយោជន៍សំខាន់ៗសម្រាប់អ្នកប្រើប្រាស់៖
§ សម្រាប់ពាណិជ្ជករ៖ សហគមន៏កសិកម្ម កសិពាណិជ្ជករ ក្រុមហ៊ុន/សហគ្រាសកែច្នៃនាំចេញ ក្រុមហ៊ុនផ្គត់ផ្គង់សម្ភារកសិកម្ម និងក្រុមហ៊ុនផ្គត់ផ្គង់ចែកចាយផលិតផលកសិកម្ម អាចចុះឈ្មោះដាក់លក់ផលិតផល គ្រប់គ្រងការទិញលក់ ការដឹកជញ្ជូន និងការទូទាត់ប្រាក់ជាដើម។
§ សម្រាប់អ្នកប្រើប្រាស់៖ អាចស្វែងរកព័ត៌មានផលិតផលដែលមានប្រភពច្បាស់លាស់ដែលអាចជឿទុកចិត្តបាន តម្លៃសមរម្យ សេវាកម្មហិរញ្ញវត្ថុ និង អាចទិញ-លក់ ផលិតផលជាច្រើនប្រភេទតាមតម្រូវការ ពីពាណិជ្ជករដែលបានដាក់លក់នៅក្នុងផ្សារ ARDB។
ចក្ខុវិស័យ
ក្លាយជាផ្សារឌីជីថលឈានមុខគេលើវិស័យកសិកម្មនៅកម្ពុជា ដោយមានការទទួលស្គាល់ទាំងថ្នាក់ជាតិ និង អន្តរជាតិ។
បេសកកម្ម
1. ផ្សារភ្ជាប់អ្នកពាក់ព័ន្ធ និងទីផ្សារ៖ ធ្វើការភ្ជាប់រវាងអ្នកផ្គត់ផ្គង់ធាតុចូល អ្នកផលិត អ្នកកែច្នៃ និងសហគ្រាសនានា ជាមួយផ្សារ ដើម្បីជំរុញការលក់ និងចែកចាយ ផលិតផលកសិកម្មប្រកបដោយភាពជឿជាក់ និងទំនុកចិត្តខ្ពស់។
2. ផ្សារភ្ជាប់សេវាកម្មហិរញ្ញវត្ថុ៖ ធ្វើការភ្ជាប់សេវាកម្មហិរញ្ញវត្ថុ ទៅកាន់អ្នកពាក់ព័ន្ធក្នុងខ្សែសង្វាក់ផលិតកម្មកសិកម្ម ដើម្បីអភិវឌ្ឍសមត្ថភាពហិរញ្ញវត្ថុ សម្រួលការវិនិយោគ និងពង្រឹងសមត្ថភាពប្រកួតប្រជែង។
3. ការអភិវឌ្ឍសេដ្ឋកិច្ចជនបទតាមរយៈបច្ចេកវិទ្យាឌីជីថល៖ ជំរុញកំណើនសេដ្ឋកិច្ចជនបទ ដោយផ្តល់ការគាំទ្រ និងការបណ្តុះបណ្តាលផ្នែកឌីជីថល ដើម្បីបង្កើនសមត្ថភាពក្នុងការប្រើប្រាស់បច្ចេកវិទ្យា សំដៅលើកកម្ពស់ផលិតភាព និងការឈានទៅកាន់ទីផ្សារឱ្យកាន់តែទូលំទូលាយ។
4. ការលើកកម្ពស់ផលិតផលក្នុងស្រុក និងការចូលរួមក្នុងខ្សែសង្វាក់តម្លៃ៖
លើកតម្កើងផលិតផលក្នុងស្រុក និងការផ្សារភ្ជាប់ផលិតផលទាំងនោះទៅក្នុងខ្សែសង្វាក់តម្លៃ សំដៅបង្កើតឱកាសឱ្យកសិផលក្នុងស្រុកមានតម្លៃបន្ថែម និងមានសមត្ថភាពប្រកួតប្រជែងខ្ពស់នៅលើទីផ្សារ។
គោលដៅ
1. បង្កើនការចូលរួម៖ ផ្តល់ឱកាសឲ្យសហគមន៍ និងកសិករចូលរួមពេញលេញក្នុងទីផ្សារឌីជីថល ដើម្បីលក់ផលិតផល កសាងឱកាសពាណិជ្ជកម្ម និងបង្កើនចំណូលសម្រាប់ជីវភាពកាន់តែប្រសើរ។
2. ការទាក់ទាញអ្នកទិញ និងដៃគូពាណិជ្ជកម្ម៖ ជំរុញការទាក់ទាញអ្នកទិញ និងដៃគូពាណិជ្ជកម្មថ្មីៗ តាមរយៈការពង្រីកបណ្តាញទីផ្សារ ដោយផ្អែកលើយុទ្ធសាស្រ្តផ្សព្វផ្សាយ និងកិច្ចសហការប្រកបដោយទំនុកចិត្ត។
3. ការពង្រឹងសេវាកម្មហិរញ្ញវត្ថុ និងព័ត៌មាន៖ ផ្តល់ជូននូវសេវាកម្មហិរញ្ញវត្ថុបន្ថែម និងព័ត៌មានទីផ្សារ ដើម្បីគាំទ្រដល់សមត្ថភាពប្រកួតប្រជែង និងជម្រុញផលិតភាពកសិកម្មឱ្យកាន់តែប្រសើរឡើង។
4. លើកកម្ពស់ការយល់ដឹងអំពីគុណភាព និង តម្លៃ៖ បង្កើនការផ្សព្វផ្សាយផ្នែកទីផ្សារ ដើម្បីកសាងទំនុកចិត្តរវាង អ្នកលក់ និងអ្នកទិញ។
5. ការពង្រឹងភាពជាដៃគូ៖ ពង្រឹងកិច្ចសហការជាមួយវិស័យឯកជន និងស្ថាប័នរដ្ឋាភិបាល ដើម្បីធានាឱ្យបាននូវការអភិវឌ្ឍប្រកបដោយចីរភាព និងការរីកចម្រើននៃផ្សារ ARDB។
